డిప్యూటీ సీఎం పవన్ కల్యాణ్ గుడ్ న్యూస్ చెప్పిన పవన్.. ఇక వారందరికీ పండగే!

ఆంధ్రప్రదేశ్ హస్త కళల వైభవాన్ని ప్రతిబింబించే ఏటికొప్పాక, కొండపల్లి బొమ్మల కళాకారులకు ఉప ముఖ్యమంత్రి పవన్ కల్యాణ్ శుభవార్త అందించారు. ఈ కళల ఉత్పత్తిలో వాడే అంకుడు, తెల్ల పొణికి చెట్లను విస్తారంగా పెంచాలని ఆయన అధికారులను ఆదేశించారు. ప్రస్తుతం ముడి సరుకు దొరక్క కళాకారులు ఎదుర్కొంటున్న సమస్యలను గుర్తించి, దీనికి పరిష్కారంగా అంకుడు, తెల్ల పొణికి చెట్ల పెంపకానికి వేగంగా చర్యలు తీసుకోవాలని పవన్ సూచించారు.

పంచాయతీ రాజ్, గ్రామీణాభివృద్ధి శాఖలతో కలిసి, ఈ చెట్ల పెంపకాన్ని ఉపాధి హామీ పథకంలో భాగంగా చేపట్టాలని పవన్ కల్యాణ్ ఆదేశించారు. అటవీ ప్రాంతాలతో పాటు ప్రభుత్వ భూముల్లోనూ వీటిని పెంచేందుకు ప్రత్యేక ప్రణాళికలు రూపొందించాల్సిందిగా అధికారులను ఆదేశించారు. భవిష్యత్తులో ఇలాంటి సమస్యలు ఎదుర్కోకుండా, మరిన్ని తరాలకు సరిపడా చెట్ల పెంపకానికి ప్రణాళికలు సిద్ధం చేయాలని పి.ఆర్. అండ్ ఆర్.డి. అధికారులకు స్పష్టం చేశారు.

ఏటికొప్పాక, కొండపల్లి కళాకారులు ఎదుర్కొంటున్న ఈ సమస్యను ప్రతిపక్ష నేతగా పవన్ కల్యాణ్ గతంలో పర్యటనల సమయంలో గమనించి, డిప్యూటీ సీఎం హోదాలో ఈ సమస్యకు పరిష్కార మార్గాలు సూచించడం గమనార్హం. అంతేకాక, రాష్ట్ర ప్రభుత్వ ఆధ్వర్యంలో జరిగే అధికారిక కార్యక్రమాల్లో ఆంధ్రప్రదేశ్ కళాకారులు తయారుచేసిన కళాకృతులను సత్కారం గా ఇవ్వడం ద్వారా హస్త కళలకు మరింత గుర్తింపు తీసుకురావడానికి పవన్ ప్రత్యేక కృషి చేస్తున్నారు.