2026లో బుల్లెట్ ట్రైన్ స్టార్ట్! దక్షిణ భారత ప్రధాన నగరాలు కేవలం గంటల్లోనే!

బుల్లెట్ ట్రైన్: దేశంలో వందేభారత్ ఎక్స్‌ప్రెస్ రైలు సేవలు వేగంగా విస్తరిస్తున్నాయి. ప్రస్తుతం చైర్ కార్ కోచ్‌లతో నడుస్తున్న ఈ రైళ్లకు త్వరలోనే స్లీపర్ కోచ్‌ల వెర్షన్ కూడా అందుబాటులోకి రానుంది. తెలుగు రాష్ట్రాలతో పాటు కర్ణాటక, తమిళనాడులోనూ ఈ సేవలు విస్తరించాయి. ఈ నేపథ్యంలో ఆంధ్రప్రదేశ్ ముఖ్యమంత్రి నారా చంద్రబాబు నాయుడు దక్షిణ భారత అభివృద్ధిని ప్రాధాన్యంగా తీసుకుని నాలుగు ప్రధాన నగరాలను కలిపే బుల్లెట్ రైలు ప్రాజెక్ట్‌పై ప్రపోజల్ పెట్టారు. ఆంధ్రప్రదేశ్‌లో ఆర్థిక వృద్ధి, మౌలిక సదుపాయాల అభివృద్ధిపై కూడా ఆయన కీలక వ్యాఖ్యలు చేయడంతో, అమరావతి రాజధాని పునర్నిర్మాణం తిరిగి ఊపందుకుంది

ప్రతిపాదిత బుల్లెట్ ట్రైన్ కారిడార్‌పై దృష్టి పెట్టిన చంద్రబాబు, త్వరలోనే డీటెయిల్డ్ ప్రాజెక్ట్ రిపోర్ట్ (DPR) సిద్ధం చేస్తామని ప్రకటించారు. DPR పూర్తయిన తర్వాత, కేంద్రానికి సమర్పించి హై స్పీడ్ రైల్ కారిడార్ మంజూరును కోరుతామని తెలిపారు. ఈ ప్రాజెక్టును 2026లో ప్రారంభించేందుకు లక్ష్యంగా పెట్టుకున్నామని చెప్పారు. ఈ కారిడార్‌ ద్వారా దక్షిణ భారత ప్రధాన నగరాలు అయిన హైదరాబాద్, బెంగుళూరు, చెన్నైల మధ్య రవాణా సులభతరం అవుతుందని, ప్రయాణికుల సౌకర్యాలు మెరుగవుతాయని వివరించారు. గూడ్స్ రవాణాతో పాటు, రాష్ట్రంలో పారిశ్రామిక రంగం పురోగతి సాధిస్తుందని, ఆర్థిక వృద్ధికి మద్దతు చేకూరుతుందని ఆయన అభిప్రాయపడ్డారు.