బండి సంజయ్ రాకతో అశోక్ నగర్ చౌరస్తా వద్ద పరిస్థితి మరింత ఉద్రిక్తమైంది. హాస్టళ్ల దగ్గర అడుగడుగునా పోలీసుల పహారా కట్టుదిట్టంగా కొనసాగుతోంది. నిరుద్యోగులను హాస్టళ్ల నుంచి బయటకు రానీయకుండా పోలీసులు ఆంక్షలు విధిస్తున్నప్పటికీ, వారిని అదుపులో ఉంచడంలో విఫలమవుతున్నారు. నిరుద్యోగులు పోలీసుల నిర్బంధాలను ధీటుగా ఎదుర్కొంటూ అశోక్ నగర్ చౌరస్తాకు చేరుకుంటున్నారు.
హైదరాబాద్‌లో గ్రూప్-1 అభ్యర్థుల ఆందోళన ఉద్రిక్తతలకు దారితీసింది. పోలీసులతో అభ్యర్థుల మధ్య తోపులాట జరిగింది. సచివాలయం ముట్టడికి పిలుపునిచ్చిన బీజేపీ నేత బండి సంజయ్‌ను పోలీసులు అరెస్ట్ చేశారు, దీనితో ఆందోళన మరింత ఉధృతమైంది. గ్రూప్-1 అభ్యర్థులు పోలీస్ వాహనాలను అడ్డుకునే ప్రయత్నం చేశారు. ఇదే సమయంలో, బీఆర్ఎస్ నేతలు కూడా ధర్నాలో ప్రవేశించడంతో బీఆర్ఎస్-బీజేపీ నేతల మధ్య ఘర్షణ చెలరేగింది. ఈ ఘర్షణలో భాగంగా, కొందరు బీఆర్ఎస్ నేతలు మరియు గ్రూప్-1 అభ్యర్థులను పోలీసులు అదుపులోకి తీసుకున్నారు. సచివాలయం వద్ద పరిస్థితి ఉద్రిక్తంగా మారడంతో ట్రాఫిక్ భారీగా నిలిచిపోయింది, నగరంలో కల్లోలం సృష్టించింది.
గ్రూప్-1 మెయిన్స్ పరీక్షల తేదీ అక్టోబర్ 21న దగ్గరపడుతున్న వేళ, బీజేపీ ఆందోళనలను ముమ్మరం చేసింది. హైదరాబాద్ అశోక్‌నగర్‌లో నిరసన తెలుపుతున్న గ్రూప్-1 అభ్యర్థులను కేంద్ర హోంశాఖ సహాయ మంత్రి బండి సంజయ్ కలిశారు. అభ్యర్థులతో కలిసి రోడ్డుపై బైఠాయించి, గ్రూప్-1 బాధితులకు న్యాయం చేయాలని డిమాండ్ చేశారు. నిరుద్యోగులు కూడా బండి సంజయ్‌తో కలిసి ఆందోళనలో పాల్గొన్నారు. అభ్యర్థులకు న్యాయం జరిగేంత వరకు వెనక్కి తగ్గేది లేదని బండి సంజయ్ స్పష్టం చేస్తూ, ఛలో సెక్రటేరియట్‌కు పిలుపునిచ్చారు.
గ్రూప్ 1 అభ్యర్థులు పెద్ద ఎత్తున బండి సంజయ్‌ను కలుసుకుని తమ గోడును వెళ్లబోసుకుంటున్నారు. మహిళా అభ్యర్థులు తమపై జరిగిన అఘాయిత్యాన్ని వివరిస్తూ, మహిళ అని కూడా చూడకుండా పోలీసులు దారుణంగా కొట్టి, 12 గంటల పాటు నిర్బంధించారని ఆరోపిస్తున్నారు. ఈ సంఘటనలతో గ్రూప్-1 వివాదం మరింత ఉద్రిక్తతను సృష్టించి, రాజకీయ వేడి పుట్టిస్తుంది.
Join WhatsApp Group